Sayt xəritəsi
 
Bizimlə əlaqə

XƏBƏRLƏR

UNİVERSİTETİN NÖVBƏTİ HAMİLİK TƏDBİRİ NAXÇIVAN MUXTAR RESPUBLİKASI SƏFƏRBƏRLİK VƏ HƏRBİ XİDMƏTƏ ÇAĞIRIŞ ÜZRƏ DÖVLƏT XİDMƏTİ İLƏ BİRGƏ KEÇİRİLİB

05.11.2018

 

Naxçıvan Muxtar Respublikası Ali Məclisi Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamının icrası məqsədilə Naxçıvan Dövlət Universiteti Pedaqoji fakültəsinin Çağırışaqədərki hazırlıq və mülki müdafiə  ixtisasının tələbələri ilə birgə Naxçıvan Muxtar Respublikası Səfərbərlik və hərbi Xidmətə Çağırış üzrə Dövlət Xidmətinin təşkil etdiyi elmi nəzəri konfrans keçirilib.

Çağırışaqədərki hazırlıq və mülki müdafiə  kafedrasının müəllimi Nazim Həsənov raport verdikdən sonra həmin ixtisas üzrə tələbələrin sıra hazırlığı dərsinə baxış olub.

Universitetin rektoru, AMEA-nın müxbir üzvü Saleh Məhərrəmov bildirib ki,  universitetdə mövcud olan vətənpərvərlik işi vətənpərvərlik tərbiyəsinin əsas tərkib hissəsi olaraq Azərbaycan xalqının və dövlətinin hərb tarixi ilə bağlı olan milli dəyərlərə əsaslanır və həyata keçirilir. Vurğulanıb ki, ən əsas məsələ ondan ibarətdir ki, gənclər Vətənə sonsuz sədaqət, xalqa məhəbbət, milli adət və ənənələrə hörmət, Azərbaycan Respublikası Silahlı Qüvvələrinə sevgi və məhəbbət, düşmənə nifrət, hər an Azərbaycan Respublikasının müstəqilliyi və ərazi bütövlüyü uğrunda mübarizəyə hazır olmaq ruhunda tərbiyə olunur.

“Müstəqillik xalqımızın ən böyük sərvətidir” adlı çıxışında Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin rəisi, general-mayor Səxavət Salmanov qeyd edib ki, məhz ümummilli liderin xilaskarlıq missiyası nəticəsində Azərbaycanın dövlət müstəqilliyi qorunub saxlanılıb,  digər sahələrdə olduğu kimi ordu quruculuğunda da islahatlar aparılıb. Ordunun müasir texnika ilə gücləndirilməsi, şəxsi heyətin milli, mənəvi-psixoloji hazırlığın istiqamətində mühüm tədbirlər həyata keçirilib. Bildirilib ki, əsası Ümummilli lider Heydər Əliyev tərəfindən qoyulmuş müasir Azərbaycan Möhtərəm Prezidentimiz cənab İlham Əliyevin müdrik siyasi fəaliyyəti nəticəsində inamla irəliləyir və ölkə başçısının fəaliyyətinin ana xəttini təhlükəsizlik, ictimai-siyasi sabitlik, iqtisadiyyatda davamlılıq, dövlətçilikdə xalq faktorunun üstün mövqeyi, ordu quruculuğu təşkil etməklə dövlətimizin və xalqımızın, əmin-amanlığı, tərəqqisi təmin edilməkdədir. Diqqətə çatdırılıb ki, 2016-cı ilin aprel döyüşləri, bu ilin may ayında Günnüt əməliyyatı Azərbaycan xalqının qələbəyə inamımının, ordu və xalqın birliyinin və  xüsusi olaraq Naxçıvan Muxtar Respublikası Ali məclisi Sədri cənab Vasif Talıbovun  qayğısı altında  əsgər və zabitlərin döyüş əzmindən xəbər verir.

Azərbaycan Respublikasının dövlət bayrağının dövlət müəssisəslərində, ictimai təşkilatlarda müvafiq formada istifadə qaydaları haqqında xidmətin əməkdaşı, mayor Vüsal Əliyev məlumat verib.

“Dövlət bayrağımız qürur mənbəyimizdir” adlı çıxışında həmin  kafedranın müəllimi Pərviz Allahverdiyev bayraq gününün tarixinə nəzər salıb, 2009-cu il noyabrın 17-də Azərbaycan Respublikasının Prezidenti cənab İlham Əliyevin “Azərbaycan Respublikasının Dövlət Bayrağı Gününün təsis edilməsi haqqında” Sərəncamını xatırladıb. Vurğulanıb ki, həmin il dekabrın 4-də  Milli Məclis noyabrın 9-nu Dövlət Bayrağı Günü kimi kimi rəsmiləşdirib.

Sonda fakültənin dekanı,  pedaqogika üzrə fəlsəfə doktoru, dosent Vəli Əliyev belə hamilik tədbirlərinin keçirilməsinin tələbələrinin nəzəri biliklərinin təcrübədə möhkəmlənməsində artan rolundan danışıb, öz minnətdarlığını ifadə edib.