Naxçıvan Dövlət Universitetində I kurs magistrantlarla görüş olub
Ali təhsil ocağında keçirilən görüşdə şəhidlərimizin əziz xatirəsi bir dəqiqəlik sükutla yad edilib.
Sonra universitetin tanıtım videosu nümayiş olunub.
Tədbiri giriş sözü ilə açan universitetin rektoru Elbrus İsayev qeyd edib ki, bu il magistraturaya 250 yerə qarşı 204 magistrant qəbul olub. Hal-hazırda magistraturada 80 ixtisas üzrə kadr hazırlığı həyata keçirildiyini vurğulayan rektor Naxçıvan Dövlət Universitetinin ölkədə bu sahə üzrə I sırada olduğunu diqqətə çatdırıb. Qeyd edilib ki, ali təhsil ocağında bakalavr təhsili ilə yanaşı magistr təhsili də daim diqqətdə saxlanılır. İxtisaslı kadrların hazırlanmasında magistr pilləsinin mühüm əhəmiyyətindən danışan rektor bu gün universitetin magistraturasını bitirən məzunların muxtar respublikanın təhsil sahəsinə mühüm töhfələr verdiyini vurğulayıb. Magistr dərəcəsinə sahib olan şəxslərin ali təhsil müəssisələrində pedaqoji fəaliyyətlə yanaşı, ixtisası üzrə əmək fəaliyyəti ilə də məşğul ola biləcəklərini diqqətə çatdıran Elbrus İsayev yeni tədris ili münasibəti ilə magistrantları təbrik edərək, onlara dərslərində uğurlar arzulayıb.
Magistratura mərkəzinin direktoru, biologiya üzrə elmlər doktoru, professor Etibar Məmmədov qeyd edib ki, magistratura pilləsində tələbələr artıq ümumi nəzəriyyə deyil, sırf ixtisasları üzrə təhsil alaraq özlərini təkmilləşdirir, elmi məqalələr, magistr dissertasiyası yazaraq, elmi fəaliyyətlərinin ilk mərhələsinə qədəm qoyurlar. Diqqətə çatdırılıb ki, magistrantlar onlar üçün yaradılan səmərəli şəraitdən bəhrələnərək respublikamızın müxtəlif ali təhsil müəssisələrində və xarici ölkələrdə keçirilən elmi konfranslarda iştirak edirlər. Bildirilib ki, magistratura təhsili bütün dünyada ümumi qazanılan bakalavr təhsilinin davamı olub, həm ixtisas, həm də elmi qabiliyyətlərin əsası sayılır.
2022-ci ildə ümumi orta müvəffəqiyyət göstəricisi 97.28 bal olmaqla muxtar respublikada magistatura üzrə ən yüksək nəticəni toplayan Azərbaycan dili ixtisaslaşması üzrə I kurs magistrant Səkinə Məmmədzadə ali təhsil ocağında tələbələrə göstərilən qayğıya görə minnətdarlıq edib.
Sonda magistrantların sualları cavablandırılıb.
