Naxçıvan Dövlət Universitetində “Müasir mərhələdə magistr hazırlığı: Prioritetlər, hədəflər” mövzusunda seminar keçirilib
Ali təhsil ocağının Magistratura mərkəzində “Müasir mərhələdə magistr hazırlığı: Prioritetlər, hədəflər” mövzusunda seminar keçirilib. Tədbiri giriş sözü ilə açan universitetin rektoru Elbrus İsayev qeyd edib ki, universitetdə magistratura təhsilinə verilən xüsusi önəmin nəticəsidir ki, son illərdə bunun üçün münbit şərait və möhkəm maddi texniki baza formalaşdırılıb. Yaradılan şəraitin nəticəsində magistraturada 45 ixtisas və 76 ixtisaslaşma üzrə qəbul aparılır. Diqqətə çatdırılıb ki, 2020-2021-ci ilin qəbulunda magistraturaya 248 plan yerinə qarşı 208 nəfər qəbul olunub ki, bu da son 10 ilin ən yüksək nəticəsi hesab olunur. Dissertasiyalarda informasiya-kommunikasiya texnologiyalarının tətbiqinə geniş yer verilməsinin önəmini diqqətə çəkən rektor seçilən mövzuların doğma yurdun tarixini, mədəniyyətini, incəsənətini əks etdirməsinin əsas hədəf meyarlarından biri olduğunu deyib.
Magistratura mərkəzinin direktoru Etibar Məmmədov “Magistr hazırlığı və günün tələbləri” mövzusunda çıxış edərək vurğulayıb ki, magistrarura – ali təhsilin ikinci səviyyəsinin tələblərinə uyğun olaraq, yüksək ixtisaslı, sərbəst yaradıcılıq fəaliyyəti göstərə biləcək mütəxəssislərin hazırlığını təmin edən təhsil prosesidir. Bildirilib ki, ali təhsil ocağında şöbə kimi fəaliyyətə başlayan magistraturaya ilk qəbul 1997-ci ildə aparılıb və 7 ixtisaslaşma üzrə 27 nəfər magistraturaya qəbul olunub. Vurğulanıb ki, iki ildir ki, magistraturaya qəbul bir mərhələdə həyata keçirilir, bununla da bura qəbul olunan tələbələrin daha asanlıqla təhsilin növbəti pilləsinə daxil olmaq imkanları təmin edilir. Mərkəzin direktoru onu da qeyd edib ki, bu il fevral ayında kecirilən qəbulun nəticələrinə görə təkcə bakalavr mərhələsinin bu il bitirəcək məzunların 154 nəfəri müsabiqə şərtlərini ödəyib. İyun ayında təkrar qəbulun da aparılacağını, eləcə də əvvəlki illərdə məzun olmuş bakalavrların da qəbulda iştirakını nəzərə alsaq, bu il universitet üzrə magistratura səviyyəsinə qəbulda yüksək nəticə olacağını proqnozlaşdırmaq olar.
“Azərbaycan dili və ədəbiyyatı” kafedrasının dosenti Arif Ağalarov “Magistr təhsilinə marağın artırılması yolları” mövzusunda çıxışında diqqətə çatdırıb ki, magistratura təhsili ixtisaslaşmalar üzrə hər hansı ixtisas sahəsinin elmi-tədqiqat və ya peşəkar məqsədlər üçün daha dərindən öyrənilməsini nəzərdə tutur və məzunlara peşəkar fəaliyyətlə, elmi tədqiqat və elmi-pedaqoji işlərlə məşğul olmaq hüququ verir.
Sonda “Beynəlxalq münasibətlər və diplomatiya ixtisaslaşması üzrə II kurs magistrant Aysu Cavadlının “Magistratura təhsilində qazandığımız təcrübələr və perspektivlər” “İngilis dili” ixtisaslaşması üzrə I kurs magistrant Lalə Rzayevanın isə “Magistratura təhsilinin gələcək karyeramıza təsiri” mövzuları üzrə çıxışları dinlənilib.
