Naxçıvan Dövlət Universitetinin Fransız dili müəllimləri Fransız İnstutunun onlayn pedaqoji təlimində iştirak ediblər

Fransanın Azərbaycandakı səfirliyinin nəzdində fəaliyyət göstərən Fransız İnstutunun Azərbaycanda Fransız dili müəllimləri üçün pedaqogikaya dair təlimi təşkil olunub. Naxçıvan Dövlət Universiteti  Xarici dillər fakültəsinin “Roman-german dilləri” kafedrasının baş müəllimi Əzizə Əliyeva  və həmin kafedranın müəllimi Hidayət Əkbərov təlimdə iştirak ediblər. İki hissədən ibarət təlimin birinci mərhələsində onun təşkili qaydaları, ikinci mərhələdə isə təlimin tətbiqinə dair məsələlərə aydınlıq gətirilib. Fransanın Franş – Komte Universitetinin Tətbiqi Dilçilik Mərkəzinin eksperti, fransız dili üzrə müəllim Aude Dubuisson Jouffroyun keçdiyi təlimdə dilin tədrisinə aid müxtəlif mövzulara toxunulub, dilin öyrənilməsində qarşıya çıxan çətinliklər və onların həlli yolları müzakirə olunub. Təlimdə nəzəri biliklərlə  yanaşı, təcrübi məşğələlər və simulyasiyalar da göstərilib. Sonda müəllimləri maraqlandıran suallar cavablandırılıb.

Qeyd edək ki, təlimdə həmçinin, Bakı Dövlət Universiteti, Gəncə Dövlət Universiteti, Azərbaycan Dövlət Pedaqoji Universiteti, Azərbaycan-Fransız Universiteti (UFAZ), Azərbaycan Dillər Universiteti, Bakı Slavyan Universiteti və digər tədris sektorlarından, Bakı Slavyan Universitetinin Humanitar Liseyi, Landau məktəbi (“Landau School”) ndən seçilmiş 15 nəfər fransız dili müəllimi iştirak ediblər.  Fransız dili müəllimlərinin seçilməsində Azərbaycan Fransız İnstutunun direktor müavini Hakan Jonathan Ünlünün əməyi xüsusilə qeyd edilib.

Məlumat üçün onu da bildirək ki, 8 gün davam edən təlimi uğurla keçən hər bir iştirakçı attestat ilə təltif olunub və  Azərbaycanda Fransız İnstutunun fransız dili müəllimləri üçün təşkil edəcəyi növbəti təlimlərdə iştirak hüququ əldə ediblər.