Naxçıvan Dövlət Universitetində "IQAinAR HUB" (E-platform) mövzusunda əhəmiyyətli bir təlim keçirilib. Təlim interaktiv dəyirmi masa formatında təşkil edilib və iştirakçılar üçün məhsuldar müzakirə mühiti yaradılıb. Təlimin əsas məqsədi E-platformun məqsədlərini və istifadəsinin əsas prinsiplərini iştirakçılara öyrətməkdən ibarət olub. Eyni zamanda, platformanın təqdim etdiyi üstünlüklər, müasir tələblərə uyğunluğu və keyfiyyət təminatına verdiyi töhfələr vurğulanıb.
Təlim zamanı ESG (Standards and Guidelines for Quality Assurance in the European Higher Education Area) və FIBAA (Foundation for International Business Administration Accreditation) standartları haqqında geniş məlumat verilib. Bu standartların ali təhsil müəssisələrində keyfiyyət təminatı və akkreditasiya prosesində oynadığı mühüm rol xüsusi olaraq qeyd edilib. Eyni zamanda, keyfiyyət indikatorları və onların effektiv idarə edilməsi haqqında da ətraflı müzakirələr aparılıb.
İştirakçılar E-platformun təqdim etdiyi yeniliklər və imkanlarla tanış olaraq, keyfiyyətin idarə edilməsində müasir yanaşmaları öyrənmək imkanı qazanıblar. Təlim zamanı müzakirə edilən mövzular və verilən praktiki bilgilər iştirakçılara E-platformdan daha effektiv istifadə etmə yollarını başa düşməyə kömək edib. Təlim Naxçıvan Dövlət Universitetinin beynəlxalq standartlara uyğun olaraq fəaliyyət göstərməsi istiqamətində mühüm bir addım kimi qiymətləndirilib.
