Ali təhsil ocağının Elmi Kitabxanasında Azərbaycan Yazıçılar və Jurnalistlər birliyinin üzvü, Naxçıvan Muxtar Respublikasının “Əməkdar mədəniyyət işçisi”, filologiya üzrə fəlsəfə doktoru, dosent, şair-dramaturq Həsənəli Eyvazlı ilə görüş təşkil edilib.
Naxçıvan Dövlət Universitetinin Həmkarlar İttifaqı Komitəsinin sədri Nicat Yaqubov bildirib ki, Həsənəli Eyvazlı təkcə ədəbiyyatımızı və ədəbi nümunələrimizi deyil, eyni zamanda tariximizi, zəngin adət-ənənələrimizi dərindən araşdırmış və ən incə məqamları belə öz əsərlərində qələmə almışdır. Qeyd olunub ki, ümumilikdə 4 elmi və 12 bədii əsərin, 30-a yaxın elmi məqalənin müəllifi olan Həsənəli Eyvazlı məhsuldar yaradıcılıq yolu keçib, dram əsərləri Naxçıvan Dövlət Milli Musiqili Dram Teatrında tamaşaya qoyulub.
Naxçıvan Yazıçılar Birliyinin sədri, Azərbaycan Respublikasının Əməkdar mədəniyyət işçisi, şair-dramaturq Asim Yadigar və NDU-nun Tarix-filologiya fakültəsinin dekanı, filologiya üzrə fəlsəfə doktoru, dosent Arif Ağalarov çıxış edərək görkəmli dramaturqun zəngin yaradıcılıq fəaliyyətinə nəzər salıblar. Qeyd olunub ki, şairin əsərləri bundan sonra da öz təravətini itirməyəcək, daim oxucularının rəğbətini qazanacaq və gənclərin vətənpərvər ruhda yetişməsinə stimul verəcək.
Tədbirdə Naxçıvan Dövlət Universitetinin və Naxçıvan Müəllimlər İnstitutunun tələbələrinin bədii qiraətləri dinlənilib.
Sonra görkəmli şair-dramaturq Həsənəli Eyvazlı görüşün təşkilində əməyi olanlara minnətdarlıq edib, öz şeirlərini səsləndirib.
Sonda Naxçıvan Dövlət Universitetinin Elmi Kitabxanasının direktoru Xumar Məmmədova müəllifə gül dəstəsi təqdim edib.
