Naxçıvan Dövlət Universitetində İT şöbəsinin və universitet saytının fəaliyyətinin təkmilləşdirilməsi məqsədilə müşavirə keçirilib. Universitetin rektoru Elbrus İsayev giriş sözünü açaraq, qeyd edib ki, müasir təhsil mühitində informasiya texnologiyalarının və rəqəmsal platformaların rolu böyükdür. Universitet saytının effektiv fəaliyyəti və İT şöbəsinin peşəkar idarəetməsi universitetin beynəlxalq imicinin formalaşmasında mühüm rol oynayır.
Naxçıvan Dövlət Universitetinin İnformasiya Texnologiyaları şöbəsinin müdiri Hüseyn Əsgərli şöbənin əsas fəaliyyət istiqamətlərindən danışaraq bildirib ki, universitet şəbəkəsinin qurulması, təhlükəsizliyinin təmin edilməsi, elektron təhsil platformalarının tətbiqi və idarəsi, texnoloji yeniliklərin istifadəyə verilməsi şöbənin əsas vəzifələridir. O, server otağında yanğından mühafizə sistemi və təhlükəsizlik kameralarının quraşdırıldığını, qapılara kartla giriş sisteminin tətbiq edildiyini və HD keyfiyyətli video bağlantılar vasitəsilə xarici universitetlərlə telekörpülərin qurulduğunu qeyd edib. 2024-cü ildə bir sıra mühüm yeniliklər həyata keçirilib: NDU-nun rəsmi saytı və Elmi Kitabxananın saytı Azərbaycan və İngilis dillərində istifadəyə verilib, Tibb və Texniki kolleclər üçün yeni saytlar yaradılıb. Elektron jurnal, E-cədvəl və LMS platformaları fakültələrdə və kolleclərdə tətbiq olunub, imtahan nəticələrinin QR kod vasitəsilə oxunması və WhatsApp üzərindən tələbələrə göndərilməsi təmin edilib. Kontingent sistemi, konfrans portalı və rektorun rəsmi saytı istifadəyə verilib. Eduroam şəbəkəsi tam inteqrasiya olunub, kampusda 160 təhlükəsizlik kamerası və 190 IP telefoniya sistemi quraşdırılıb. Hüseyn Əsgərli vurğulayıb ki, bu yeniliklər universitetin texnoloji inkişafını sürətləndirmək və beynəlxalq əlaqələrini genişləndirmək məqsədinə xidmət edir. 2025-ci il üçün planlar isə bu istiqamətdə daha böyük nailiyyətləri hədəfləyir.
Naxçıvan Dövlət Universitetinin Beynəlxalq Əlaqələr üzrə prorektoru Aidə Cəlilzadə universitetin rəsmi saytının xarici dillərə tərcüməsi ilə bağlı görülmüş işlər və gələcək strategiyalar haqqında məlumat verib. Prorektor qeyd edib ki, tərcümə işləri beynəlxalq əməkdaşlığın genişləndirilməsi və xarici auditoriyaya daha dolğun məlumat çatdırılması məqsədilə həyata keçirilir. Aidə Cəlilzadə, həmçinin saytın bir neçə əsas xarici dilə tərcümə edilməli və bu prosesin davam etdirilməli olduğunu vurğulayıb.
Daha sonra müşavirə iştirakçıları informasiya texnologiyaları və universitet saytının inkişafı ilə bağlı öz təkliflərini səsləndiriblər.
Sonda rektor İT sahəsi və rəsmi saytla bağlı görüləcək işlərə dair tapşırıq və tövsiyələrini verib.
