Qaydalar  Naxçıvan  Dövlət

   Universitetinin Elmi Şurasının

     2023cü il 29 noyabr tarixli iclasının

 (protokol № 4 ) qərarı ilə təsdiq edilmişdir.

                                                                        Rektor:______________E.S.İsayev

 

 

 

NAXÇIVAN DÖVLƏT UNİVERSİTETİ

 

 

 

 

TƏDRİSİN TƏŞKİLİ, KREDİTLƏR VƏ ONLARIN TANINMASINA DAİR

 

QAYDALAR

 

 

 

 

 

 

 

 

 

 

 

 

 

 

 

 

 

 

NAXÇIVAN - 2023

 

 

 

 

 

 

 

I. Ümumi müddəalar

1.1. Naxçıvan  Dövlət Universitetində kredit sistemi ilə təhsil alan tələbələr üçün Tədrisin təşkili, kreditlər və onların tanınmasına dair Qaydalar (bundan sonra “Qaydalar” Təhsil haqqında Azərbaycan Respublikasının Qanununa, Azərbaycan Respublikası Nazirlər Kabinetinin müvafiq qərarları ilə təsdiq edilmiş “Ali təhsil pilləsinin dövlət standartı və proqramı”na, Bakalavriat təhsilinin məzmunu və təşkili Qaydalari”na, “Magistratura təhsilinin məzmunu, təşkili və “magistr” dərəcələrinin verilməsi Qaydaları”na, “Azərbaycan Respublikasının ömürboyu təhsil üzrə Milli Kvalifikasiyalar Çərçivəsi”nə, “Ali təhsil müəssisələrinin bakalavriat və magistratura səviyyələrində, əsas (baza ali) tibb təhsilində və Azərbaycan Milli Elmlər Akademiyasının magistratura səviyyəsində kredit sistemi ilə tədrisin təşkili Qaydaları”na, Azərbaycan Respublikası Elm və Təhsil Nazirliyinin müvafiq normativ sənədlərinə, “Avropa ali təhsil məkanında keyfiyyət təminatı üzrə standartlar və təlimatlara (ESG)”, “Avropa Kredit Transfer Sisteminə” və Naxçıvan Dövlət Universitetinin inkisaf strategiyasına uygun olaraq hazırlanmışdır.

1.2. Bu Qaydalara əsasən bakalavriat və magistratura təhsil səviyyələrində təlim və tədris prosesində yüksək keyfiyyətin təmin edilməsi məqsədilə Naxçıvan Dövlət  Universitetində (bundan sonra NDU) tədrisin təşkili, kreditlər və onların tanınması ilə bağlı prosedurların yüksək səviyyədə təmin olunması müəyyən edilir.

 

            1.3. Tədrisin təşkili, kreditlər və onların tanınmasına dair prosedurların idarə edilməsi “Avropa Standartları və Təlimatları”nın müddəalarına müvafiq olaraq tələbələrin təhsil və elmi karyeralarında uğur əldə etmələrini və irəliləyişləri üçün münbit şəraitin formalaşdırılmasına stimul yaradır.

 

1.4. Tədrisin təşkili, kreditlər və onların tanınmasına dair qaydaların yaradılması tədris prosesinin səmərəli təşkili, tələbələrin təhsildə bilik, bacarıq və vərdişlərinin formalaşdırılması, onların hərəkətinin uçotu və nəzarəti, tələbə mobilliyinin təmin edilməsi kimi məsələləri özündə təzahür edir.

 

II. Tədrisin təşkili.

2.1. Tədris prosesinin təşkili və həyata keçirilməsi ali təhsil müəssisələrinin fəaliyyətinin əsas sahələrindən biri olub, mütəxəssis hazırlığının həyata keçirilməsində birbaşa rol oynayır.

2.2. Kredit sistemi əsasında təşkil olunmuş tədris prosesinin xüsusiyyətləri aşağıdakılardan ibarətdir:

·         Tədris planlarına uyğun olaraq, tədris fənlərinin, semestrlər üzrə kreditlərin miqdarının seçiminin sərbəstliyini təmin etmək;

·         Təhsil prosesinə akademik məsləhətçiləri (tyutorları) cəlb etmək;

·         Tələbəyə sərbəst iş üçün şəraitin yaradılması;

·         Biliyin qiymətləndirilməsinin müasir texnologiyasını tətbiq etmək;

·         Hər semestrdə tədris qruplarını fənlər üzrə formalaşdırmaq;

·         Müəllim - tələbə mobilliyini təmin etmək;

·         Tələbə yönümlü tədrisi formalaşdırmaq.

2.3. Naxçıvan Dövlət Universitetində tədrisin təşkili və həyata keçirilməsi ilə əlaqədar məsələlər aşağıdakılardan ibarətdir:

·         Universitetdə mütəxəssis və elmi-pedaqoji kadr hazırlığının bakalavriat, magistratura və doktorantura səviyyələrində təşkili;

·         Universitetdə tədrisin əyani formalarda təşkil olunması ilə təhsilalma qaydalarının müvafiq qanunvericilik aktları ilə müəyyənləşdirilməsi;

·         Universitetdə ali təhsil pilləsinin müvafiq səviyyələri üzrə təhsilin müvafiq təhsil proqramları əsasında təşkil edilməsi;

·         Universitetdə bakalavriat və magistratura səviyyələrində tədrisin təşkilinin ali təhsil pilləsinin dövlət standartının tələblərinə, dünyanın aparıcı ali məktəblərinin təcrübəsinə əsasən həyata keçirilməsi;

·         Universitetdə bakalavr və magistr hazırlığının ayrı-ayrı ixtisaslar üzrə təhsil proqramları, onlara müvafiq hazırlanmış tədris planları, fənlər üzrə işçi tədris proqramları (sillabuslar) və digər normativ sənədlər (qiymətləndirmə qaydaları, fərdi tədris planları, dərs cədvəlləri, imtahan cədvəlləri, dərslərin reqlamentləri, təcrübələrin keçirilməsi qaydaları və s.) əsasında həyata keçirilməsi;

·         Universitetdə bakalavriat və magistratura təhsil səviyyəsinin məzmunu tədris prosesinin planlaşdırılmasını, onun həyata keçirilməsinin forma və metodlarını, tədris yükünün həcmini, tədris mərhələlərinin (semestrlərin) müddətini, tədris növlərini (mühazirə, məşğələ, laboratoriya və s.), ayrı-ayrı fənlərin həcmini və ixtisaslar üzrə təhsil proqramlarına qoyulan tələbləri əhatə etməsi;

·         Universitetdə tədris prosesinin planlaşdırılması və təşkilinin tədris planları (nümunəvi işçi və fərdi) və fənlər üzrə işçi proqramları əsasında həyata keçirilməsi;

·         Tədrisin keyfiyyətinin yaxşılaşdırılması ilə əlaqədar təkliflərin hazırlanması;

·         Universitetin partnyor olduğu təşkilatlarla sıx qarşılıqlı əlaqədə olmaqla tədrisdə mövcud innovasiyaların öyrəniləsi və tətbiqinə nail olunması.

 

Əsas anlayışlar

Bu Qaydalarda istifadə olunan əsas anlayışlar aşağıdakı mənaları ifadə edir:

1.təhsil krediti – fənnin məzmununa və həcminə uyğun olaraq, onun mənimsənilməsinə ayrılan vaxtın ölçü vahididir;

2.tələbənin fərdi tədris planı – tələbənin tədris ili ərzində təhsil alacağı fənləri, onların müvafiq kreditlərini, fənlər üzrə müəllimlərin siyahısını əks etdirən sənəddir;

3.ixtisaslar (ixtisaslaşmalar) üzrə illik işçi tədris planı–ixtisasın (ixtisaslaşmanın) tədris planına və tələbələrin fərdi tədris planlarına uyğun hazırlanmış, cari tədris ilində tədris olunacaq fənlərin adlarını, dərsin növlərini, fənlərin kreditlərini və tələbələrin sayını özündə əks etdirən sənəddir;

4.ixtisasın (ixtisaslaşmanın) tədris planı – ali təhsilin müvafiq səviyyəsində ixtisas (ixtisaslaşmalar) üzrə təhsil proqramlarına uyğun olaraq, tədris olunan fənlərə və auditoriyadankənar məşğələlərə ayrılan saatların miqdarını müəyyən edən əsas tənzimləyici sənəddir;

5.ixtisasın (ixtisaslaşmanın) tədris qrafiki – ixtisasın (ixtisaslaşmanın) tədris planında göstərilmiş fənlərin tədris illəri üzrə bölgüsünü əks etdirən sənəddir;

6.akademik mobillik – tələbənin və professor-müəllim heyətinin ölkədaxili və xarici ölkələrin ali təhsil müəssisələrində müvafiq olaraq sərbəst təhsil almaq və akademik fəaliyyət göstərmək hüququdur;

7.Avropa Kredit Transfer Sistemi (AKTS) – təhsil proqramı ilə müəyyən olunmuş kompetensiyalara nail olmaq üçün tələbənin iş yükünü və təhsilalma istiqamətini müəyyənləşdirən sistemdir. Bu sistem, həmçinin tələbələrin mobilliyini təmin edir və təhsil proqramlarının dövlətlərarası müqayisəsi və tanınması prosedurlarını asanlaşdırır;

8.prerekvizit fənlər – tədrisi ilk növbədə zəruri olan fənlərdir;

9.akademik transkript – tələbənin təhsil müddətində keçdiyi fənlər üzrə topladığı kreditləri və qiymətləri (rəqəm və hərflərlə) özündə əks etdirən sənəddir;

10. Ümumi Orta Müvəffəqiyyət Göstəricisi (ÜOMG) – tələbənin təhsil proqramını mənimsəmə səviyyəsinin göstəricisidir. ÜOMG tələbənin tədris fəaliyyətini fəallaşdırmaq, özünənəzarət mexanizmini yaratmaq, tədrisdə əldə etdiyi nailiyyətlərini qiymətləndirmək məqsədilə tətbiq edilir.

 

QEYD:

1. Tələbə tədrisə başlayan kimi «Ali təhsil müəssisələrinin bakalavriat və magistratura səviyyələrində kredit sistemi ilə tədrisin təşkili Qaydaları”nı, «Kredit sistemi ilə təhsil alan tələbələrin biliyinin qiymətləndirilməsi haqqında Əsasnamə»ni və  «Kredit sistemi ilə təhsil alan tələbələrin fənnlər üzrə imtahanları  haqqında Əsasnamə»ni diqqətlə oxumalıdır.

2. Tələbə kredit sistemi ilə təhsil alması və kredit sisteminin       mahiyyəti haqqında             valideynlərini məlumatlandırmalıdır.

 

 

 

 

 

ALİ  TƏHSİLDƏ  KREDİT  SİSTEMİ

 

                       I. Kredit sisteminin mahiyyəti

Kredit sistemi ali təhsildə tətbiq olunan fənn bitirmə və kurs bitirmə kimi iki əsas sistemdən biridir. Keçmiş sovet məkanında və bir sıra ölkələrdəki kurs bitirmə sistemindən fərqli olaraq kredit sistemi bilavasitə fənn keçməyə əsaslanan bir sistemdir. 

Hazırda  dünyada əsasən 2(iki) akademik kredit sistemi daha geniş yayılmışdır:

1.         USCS – ABŞ Kredit sistemi (United States Credit System).

2.         ECTS – Avropa Kredit transfer sistemi (European Credit Transfer System).

Birinci sistem (ABŞ Kredit Sistemi), XX əsrin əvvəllərindən tətbiq olunur və semestrdə 15-18 kredit qazanmaq imkanı verir.

ABŞ-da adətən qrup həftədə 3 saat mühazirə və ya müzakirə keçirsə bu o deməkdir ki, bakalavrın 1 kredit saatı 1 saatlıq mühazirə və 2 saatlıq ev işinə bərabərdir. Bakalavr üçün semestrdə orta tədris yükü 15 kreditə (vahidə) bərabərdir ki, bu da 45 saat dərsdə iştirak və oxumaq deməkdir.

İkinci sistem isə (Avropa Kredit Transfer Sistemi) XX əsrin 80-ci illərindən tətbiq olunmağa başlanmışdır və semestrdə 30-33 kredit qazanmaq imkanı verir.

Dünyanın müxtəlif ölkələrində kredit sisteminin tətbiqi də müxtəlifdir. Burada Universitetin «semestr» yoxsa «kvartal» sistemləri üzrə işləmələri də mühüm əhəmiyyət kəsb edir. Əksər Universitetlərdə tədris ili «Payız» (16 həftə) və «Yaz» (17 həftə) semestləri (Azərbaycanda isə hər iki semestr 15 həftədən ibarətdir) olmaqla 2 hissəyə bölünür. 8-10 həftəlik «Yay sessiyası» deyilən bir tədris müddəti də tətbiq olunur. Azərbaycanda «Yay semestrinin» müddətinin 6 həftəyədək olması nəzərdə tutulmuşdur.

 

II. Kredit sisteminin tətbiq olunduğu ölkələr

Kredit sistemi ABŞ-da, dünyanın bir çox ölkəsində və  Avropanın 40-dan çox ölkəsində tətbiq edilir.  19 may 2005-ci ildə  Norveçin Bergen şəhərində keçirilən konfransda Azərbaycan  Respublikası da Boloniya prosesinə qoşulmuşdur.2010-cu ildən ölkəmizin bütün ali məktəblərində bu sistemə keçid prosesi başa çatmışdır.

 

III. Kredit sisteminin üstünlükləri

Boloniya prosesinin əsasında Avropada vahid təhsil məkanı yaradılır. Bunun nəticəsində gələcəkdə ölkələr arasında tələbə mübadiləsi və diplomların qarşılıqlı tanınması asanlaşacaqdır. Boloniya prosesi aşağıdakı prinsiplər əsasında həyata keçirilir:

1.         ikipilləli (bakalavr və magistr) təhsil sisteminin tətbiqi;

2.         kredit sisteminin tətbiqi;

3.         təhsilin keyfiyyətinə nəzarət;

4.         tələbələrin və müəllimlərin mobilliyinin genişləndirilməsi;

5.         məzunların işə düzəlməsinin təmin olunması;

6.         Avropa təhsil sisteminə cəlb olunmanın təminatı;

7.         Təhsilin sosial yönümlülüyünün təmin edilməsi (ömürboyu təhsil).

Kredit sistemi aşağıdakı səciyyəvi xüsusiyyətlərə malikdir:

-   kredit sisteminə görə bakalavr təhsil pilləsində bir qayda olaraq tədris ili iki semestrdən (payız və yaz) ibarətdir. Bundan əlavə, yay tətili müddətində 6 (altı) həftədən çox olmayaraq yay semestri də təşkil oluna bilər;

-   bu sistem təhsildə daha yüksək göstəricilərə nail olmaq üçün stimul yaradır. Başqa sözlə, istedadlı tələbələrə yuxarı kurslardan fənn götürməklə bakalavr təhsilini 1 və ya 2 semestr tez başa vurmaq imkanı verir. Həmçinin təhsil aldığı ixtisasa yaxın ixtisaslardakı müvafiq fənlərə yiyələnmək istəyən tələbə  üçün də imkan yaranır. Bu da öz növbəsində tələbənin peşəyönümünün və dünyagörüşünün təkmilləşdirilməsinə gətirib çıxarır;

-   bu və ya digər səbəbdən hansısa fəndən qeyri-müvəffəq qiymət almış tələbəyə aşağı kursdan qalan fənni təkrar oxumaqla həmin fənni mənimsəmək imkanı qazandırır və tələbə imtahandan müvəffəq qiymət ala bilir. Beləliklə, sistem zəif tələbənin də potensialını sonuna qədər istifadə etmək üçün şərait yaradır.

-   tələbənin bu və ya digər subyektiv münasibətin, təsadüfi halların, şəxsi- qərəzçilik kimi amillərin qurbanı olması hallarını istisna edir;

-   bu sistemin tətbiqində əsas şərtlərdən biri də tələbənin dərsə davamiyyətinin məcburi olmasıdır ki, bu da tələbədə intizam və məsuliyyət hissinin artmasını təmin edir.

-   Ali təhsil müəssisəsi tələbələri kredit sisteminin təşkili qaydaları ilə tanış etməli və təhsil müddətində tələbəyə tədris planında nəzərdə tutulmuş krediti qazanmasına şərait yaratmalıdır.

-   Ali təhsil müəssisələrində kredit sistemi ilə tədrisin təşkili müvafiq qurumlar (tədris hissəsi, qeydiyyat, qiymətləndirmə, monitorinq bölmələri) tərəfindən tənzimlənir.

-   Bu Qaydalar ali təhsilin əyani (tədrisə tam cəlb olunma fulltime və  tədrisə qismən cəlb olunma-parttime) və qiyabi təhsilalma formalarına şamil edilir.

-   Bu Qaydaların icrası ilə bağlı tələb olunan xərclərin maliyyələşdirilməsi dövlət sifarişi ilə təhsil alan tələbələrə görə ali təhsil müəssisələrinə dövlət büdcəsindən ayrılan vəsaitlər, habelə həmin müəssisələr tərəfindən ödənişli təhsildən, sahibkarlıq fəaliyyətindən və qanunvericiliyə uyğun olaraq həyata keçirilən digər fəaliyyətlərdən əldə olunan vəsaitlər hesabına təmin edilir.

Kredit sistemində Azərbaycan Respublikasının Təhsil Nazirliyi tərəfindən müəyyən olunmuş formalar üzrə aşağıdakı tədris sənədlərindən istifadə edilir:

-   ixtisasın (ixtisaslaşmanın) tədris planı;

-   ixtisasın (ixtisaslaşmanın) tədris qrafiki;

-   ixtisas (ixtisaslaşma) üzrə illik işçi tədris planı;

-   tələbənin fərdi tədris planı;

-    müəllimin illik işçi tədris planı.

Kredit sistemində ali təhsil müəssisəsi tərəfindən ixtisasın (ixtisaslaşmanın) təhsil proqramı, ixtisasın (ixtisaslaşmanın) tədris planı və ixtisasın (ixtisaslaşmanın) tədris qrafiki hazırlanaraq aidiyyəti qurumlara, tələbənin fərdi tədris planı və müəllimin illik işçi tədris planı müvafiq olaraq tələbələrə və müəllimlərə verilir, eləcə də ali təhsil müəssisəsinin saytında yerləşdirilir.

 

  

IV. Kreditlərin tanınması.

4.1. Kreditlərin tanınması müvafiq ixtisaslar üzrə mütəxəssis hazırlığını həyata keçirən ali məktəbləri biri-birinə yaxınlaşdırır, onlar arasında daha sıx əlaqənin formalaşmasına imkan yaradır.

4.2. Bu sahədə tələbələrin mobilliyini təmin edən və təhsil proqramlarının dövlətlərarası müqayisəsi və tanınması prosedurlarını asanlaşdıran sistem AKTS sistemidir.

    4.3. Təhsil kreditlərinin tanınması ilə əlaqədar nəzərdə tutulan məsələlər aşağıdakılardır:

·         Universitetdə təhsil kreditlərinin tanınması ilə əlaqədar prosedurların formalaşdırılması;

·         Tələbə mobilliyinin təmin edilməsi məqsədi ilə təhsil proqramlarının digər daxili və xarici universitetlər ilə müqayisəli təhlilinin həyata keçirilməsi;

·         Universitetdə tələbə mübadiləsinin əhatə dairəsinin genişləndirilməsi məqsədi ilə daxili və xarici dövlətlərin universitetləri ilə əlaqələrin yaradılması və müqavilələrin bağlanması;

·         Universitetlərarası müqavilə standartlarının hazırlanması, daxili və xarici mübadilə qaydalarının müəyyənləşirilməsi və müqayisəli təhlilinin aparılması vasitəsi ilə tələbə mobilliyinin təmin edilməsi;

·         Təhsil proqramlarının, kreditlərin tanınması və təhsildə mobilliyin təmin edilməsinə nail olmaqla akademik mobilliyin təmin edilməsi;

·         Akademik mobilliyin təmininin Avropa Kredit Transfer Sistemi və “Ali təhsil müəssisələrinin bakalavriat və magistratura səviyyələrində, əsas (baza ali) tibb təhsilində və Azərbaycan Milli Elmlər Akademiyasının magistratura səviyyəsində kredit sistemi ilə tədrisin təşkili Qaydaları”nın təsdiq edilməsi haqqında Azərbaycan Respublikasının Nazirlər Kabinetinin № 348 saylı 24 dekabr 2013-cü il il tarixli Qərarı çərçivəsində reallaşdırılması.

4.4. Digər ali təhsil müəssisələrində  qazanılacaq kreditlərin  sayı ixtisas (ixtisaslaşma)  üzrə nəzərdə  tutulmuş kreditlərin  30%-dən  çox olmamalıdır.

4.5. Təhsil alan əvvəl aldığı ixtisasın təhsil proqramında öyrənilmiş fənlərin məzmunu yeni almaq istədiyi əlavə və ya köçürüldüyü ixtisasın təhsil proqramına daxil olan hər hansı fənnin məzmununa uyğun olduqda, həmçinin fərdi tədris planında seçmə fənn bloku üzrə nəzərdə tutulan fənlərə aid məşğələlərdən və attestasiyadan azad olunur.

4.6. Subbakalavrın kreditlərinin tanınması:

·         ilkin təhsil proqramı ilə yenidən əldə ediləcək ixtisas üzrə bakalavr təhsili proqramı arasındakı fərqin 1 tədris ilinə hesablanmış saatdan az və 2 tədris ilinə hesablanmış saatdan çox olmamalıdır;

·         təhsil müddəti subbakalavrın ilkin təhsil proqramı ilə onun təhsil almaq istədiyi müvafiq ixtisas üzrə bakalavr təhsili proqramı arasındakı fərqə əsasən müəyyən edilir.

·         ilkin təhsil proqramı ilə yenidən əldə ediləcək ixtisas üzrə bakalavr təhsil proqramı arasındakı fərqdən asılı olmayaraq, subbakalavrlar bakalavr dərəcəsi üzrə ali təhsil almaq üçün yalnız dövlət tərəfindən müəyyən olunmuş ümumi qaydada ali məktəblərin birinci kursuna qəbul olunurlar.

4.7. Kreditlərin tanınması və ekvalentliyinin tanınması üçün zəruri olan sənədlər:

- tədris müqaviləsi (Learning agreement student mobility for studies);

- tələbənin transkripti;

- universitet rəhbərliyi tərəfindən təsdiq edilmiş təhsil proqramının və fənlərin təlim nəticələri;

- fənnlərin sillabusu. 

 

 

 

V. Kredit sistemi ilə təhsil alan tələbələrin hüquq və vəzifələri

5.1. Tələbələrin hüquqları:

·         ali təhsil müəssisələrində kredit sistemi ilə tədrisin təşkili barədə qaydalar ilə tanış olmaq;

·         müstəqil şəkildə fənni və müəllimi seçmək;

·         tədrisə tam cəlb olunan (fulltime) tələbəyə əlavə fənn (fənlər) də seçməyə icazə verilir:yuxarı kursdan, eləcə də başqa ixtisasdan (əvvəlki illərdən borcu olmayan və bütün fənlərdən orta göstərici 71-100 bal arasında olan tələbələr üçün) və aşağı kursdan fənn seçmək;

·         dövlət sifarişi ilə təhsil alan və bütün təhsil müddətində ayrı-ayrı fənlərdən göstəricisi 81-100 bal arasında olan tələbələrə əlavə ödəniş etmədən  təhsil aldığı ixtisas üzrə əlavə fənn (fənlər) seçməyə icazə verilir. Bütün hallarda bir semestrdə tələbənin götürdüyü kreditlərin sayı 40-dan çox olmamalıdır;

·         lazımi çap materiallarını və onların elektron versiyalarını almaq;

·         fərdi planlarda dəyişiklik etmək 

·         tədris məsləhətçilərinin (tyutorların) xidmətindən istifadə etmək.

5.2. Tələbələrin vəzifələri:

·         ali təhsil müəssisələrində kredit sistemi ilə tədrisin təşkili barədə qaydaların tələblərinə riayət etmək;

·         təhsil müddəti üçün müəyyən olunmuş bütün kreditləri toplamaq;

·         тələbənin fərdi tədris planına ciddi riayət etmək və tədris olunan fənləri lazımi səviyyədə mənimsəmək.

VI.Tələbə və müəllim mobilliyi

6.1.Kredit sistemi ilə tədrisin təşkilində Bolonya bəyannaməsinin müddəalarına müvafiq olaraq, tələbələrin akademik mobilliyi onların digər ali təhsil müəssisələrində, o cümlədən xarici ölkə ali təhsil müəssisələrində ayrı-ayrı fənlər  üzrə kreditləri qazanmaları ilə təmin edilir. Tələbənin digər ali təhsil müəssisələrində kreditləri qazanması təhsil aldığı ali təhsil müəssisəsinin razılığı ilə həyata keçirilir. Bu zaman təhsil haqqının ödəniş şərtləri tələbə ilə göndərən və qəbul edən ali təhsil müəssisələri arasında razılaşdırılır. Qazanılmış kreditlər tələbənin təhsil aldığı ali təhsil müəssisəsi tərəfindən tanınmalıdır. Digər ali təhsil müəssisələrində qazanılacaq kreditlərin sayı ixtisas (ixtisaslaşma) üzrə nəzərdə tutulmuş kreditlərin 30 faizindən çox olmamalıdır.

6.2.Tələbənin akademik mobilliyinin ali təhsil müəssisələri arasında təmin edilməsi üçün forması və nümunələri Azərbaycan Respublikasının Təhsil Nazirliyi tərəfindən müəyyənləşdirilən aşağıdakı sənədlər olmalıdır:

- akademik transkript;

                   - tələbənin ərizə (təhsil alacağı dildə doldurulur) forması;

- tədris razılığı;

- məlumat paketi.

6.3.Professor-müəllim heyətinin mobilliyi (mühazirənin oxunması, seminarların, praktik məşğələlərin, laboratoriya işlərinin keçirilməsi) ali təhsil müəssisələri arasında xüsusi razılıq əsasında həyata keçirilir.

 

 

 

 

VII.Kredit sistemi ilə təhsil alan tələbələrin  biliyinin qiymətləndirilməsi haqqında

 

Biliyin qiymətləndirilməsinin çoxballı sistemi tələbələrin tədris fəaliyyəti nəticəsində fənnin öyrənilməsində əldə etdikləri bilik və bacarıqların qiymətələndirilməsinin yeni mexanizmidir və bu mexanizm daxili qaydalara əsasən tənzimlənir. 

Elektron Təhsil Sistemində iştirak etməyən tələbələrə həmin saata «q/b», sorğulara cavab verənlərə müvafiq «bal», dərsdə iştirak edən, lakin qiymət almayanlara isə «i/e» yazılmalıdır.

Konkret fənn üzrə semestr ərzində toplanmış balın yekun miqdarına görə tələbələrin biliyi aşağıdakı kimi qiymətləndirilir:

             - 51 baldan aşağı    - «qeyri-kafi»          - F 

- 51-60 bal	- «qənaətbəxş»	- E
- 61-70 bal	- «kafi»	- D
- 71-80 bal	-  «yaxşı»	- C
- 81-90 bal	- «çox yaxşı»	- B
- 91-100bal	- «əla»	- A

İmtahan vərəqələrində, tələbələrin qiymət kitabçalarında, diplomlara əlavələrdə və digər sənədlərdə tələbələrin fənlər üzrə qazandıqları ballar və onların hərf işarələri  qeyd olunmalıdır. 

Fənni tədris edən müəllim tələbələrə ilk gündən çoxballı sistemin əhəmiyyətini, onların tədris fəaliyyətinin müxtəlif növlərinin hansı ballarla qiymətləndirilməsini izah etməlidir.