Naxçıvan Dövlət Universitetində Maliyyə və Satınalma strategiyasına dair müşavirə keçirilib. Tədbirdə universitetin rektoru Elbrus İsayev “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı” çərçivəsində universitetə ayrılmış vəsaitlərin səmərəli şəkildə istifadə edildiyini vurğulayıb. Qeyd olunub ki, 2024-cü il ərzində universitetin maliyyə idarəçiliyində şəffaflıq və operativlik prinsiplərinə üstünlük verilib, müxtəlif satınalma metodlarının tətbiqi ilə müasir tədris və elmi-tədqiqat avadanlıqları əldə edilib. Rektor çıxışında Azərbaycan Respublikasının Elm və Təhsil Nazirliyinin universitetə verdiyi maliyyə dəstəyinin, tədris və elmi-tədqiqat fəaliyyətinin inkişafına əhəmiyyətli töhfə verdiyini xüsusi qeyd edib. Həmçinin universitetin maliyyə və satınalma siyasətinin daha da təkmilləşdirilməsi, aydınlıq və hesabatlılıq prinsiplərinin təmin edilməsi istiqamətində islahatların davam etdiriləcəyini diqqətə çatdırıb.
Universitetin Maliyyə şöbəsinin müdiri Səfəralı Abdullayev qeyd edib ki, 2024-cü ildə şöbə bir sıra mühüm yeniliklər həyata keçirib. Bunlara maliyyə əməliyyatlarının bank sisteminə inteqrasiyası, yeni proqram təminatının alınması və avtomatlaşdırma proseslərinin tətbiqi daxildir. Vurğulanıb ki, Maliyyə şöbəsinin əməkdaşlarının bacarıqlarını artırmaq üçün təhsil proqramları təşkil olunub, yeni sistemlər üzrə iş bölgüsü aparılıb və tələbə-müəllim heyətinə maliyyə əməliyyatları ilə bağlı təlimatlar verilib. Həmçinin, beynəlxalq mühasibatlıq standartlarının tətbiqinə başlanılıb və maliyyə texnologiyaları sahəsində yeni mobil tətbiqlər istifadəyə verilib. Səfəralı Abdullayev bildirib ki, şöbə, əmək haqqı, sosial sığorta, vergi və digər ödənişlərin idarə olunması ilə yanaşı, borcların və alacaqların nəzarəti, ezamiyyə və məzuniyyət ödənişlərinin təmin edilməsi kimi fəaliyyətlərdə də şəffaflıq və dəqiqliyə önəm verib. 2025-ci il üçün əsas hədəfin beynəlxalq standartlara uyğun maliyyə hesabatlarının hazırlanması olduğunu qeyd edən Səfəralı Abdullayev, hesabatların neytral, şəffaf, dəqiq və etibarlı olacağını və konseptual əsaslara uyğun maliyyə proseslərinin tətbiqinin davam etdiriləcəyini bildirib.
Naxçıvan Dövlət Universitetinin Satınalma və təchizat bölməsinin müdiri Ziya Kərim-zadə qeyd edib ki, 2024-cü ildə satınalma prosesləri aydınlıq və səmərəlilik prinsiplərinə əsaslanaraq həyata keçirilib. Universitetin müxtəlif sahələrini əhatə edən müasir avadanlıqların və digər xüsusi ləvazimatların alınması təmin olunub və tədarük proseslərinin optimallaşdırılması istiqamətində addımlar mövcud standartlar çərçivəsində həyata keçirilib. O, vurğulayıb ki, 2025-ci il üçün əsas prioritetlər satınalma prosedurlarında innovativ yanaşmaların tətbiqi, texnoloji infrastrukturun təkmilləşdirilməsi və keyfiyyətli təchizatın davamlı şəkildə təmin edilməsidir. Həmçinin beynəlxalq tədarük standartlarının inteqrasiyası və əməkdaşlıqların genişləndirilməsi planlaşdırılır.
Universitetin Strateji məsələlər üzrə rektor müşaviri Rəcəb Cəfərli 2025-ci il üzrə büdcə əsaslı fəaliyyət planından bəhs edərək qeyd edib ki, tələbəyönümlü təhsil yanaşmasının bütün kafedralarda tətbiqi və tədris məzmununun əmək bazarına uyğun təkmilləşdirilməsi əsas prioritetlərdəndir. O, vurğulayıb ki, yeni məzmunlu proqramların keyfiyyətinin artırılması, təcrübələrin təşkili, beynəlxalq qrant proqramlarına layihələrin təqdim olunması, həmçinin akademik heyət və tələbələrin ingilis dili biliklərinin artırılması üçün intensiv kursların təşkilinə diqqətin ayrılması planlaşdırılır. Rəcəb Cəfərli bildirib ki, universitetdə Proqram Mühəndisliyi İnstitutunun yaradılması, Scopus bazalı beynəlxalq konfransların təşkili və elmi məqalələrin “Web of Science” və “Scopus” jurnallarında dərcinə təşviq planlaşdırılır. Əlavə olaraq, sənaye müəssisələri ilə əməkdaşlıq çərçivəsində tələbələrin məqsədyönlü hazırlanması, əcnəbi akademik heyətin artırılması, ikili diplom proqramlarının tətbiqi və QS, QS Star və THE reytinqlərində təmsil olunma istiqamətində işlər davam etdiriləcək.
Universitetin İqtisadi məsələlər üzrə rektor müşaviri Ülvi Baxışlı qeyd edib ki, 2025-ci ildə Hesablama Palatası ilə birgə həyata keçiriləcək təlim proqramları universitetin maliyyə idarəçiliyi sahəsində yeni imkanlar yaradacaq. Təlimlərdə tələbələrə və əməkdaşlara büdcə planlaşdırılması, audit standartları və maliyyə şəffaflığına dair biliklər təqdim olunacaq. Ülvi Baxışlı vurğulayıb ki, növbəti mərhələdə bu əməkdaşlığın genişləndirilməsi nəzərdə tutulur. Planlaşdırılan fəaliyyətlərə maliyyə sahəsində praktiki təcrübələrin artırılması, tələbələr üçün təcrübə proqramlarının təşkili və universitetin maliyyə proseslərinin optimallaşdırılmasına dəstək daxildir. Bu istiqamətlər həm təhsil keyfiyyətini artırmaq, həm də maliyyə idarəetməsində effektivliyi təmin etmək məqsədi daşıyır.
Sonda Elbrus İsayev, universitetin maliyyə, təchizat və strateji inkişaf istiqamətlərində görülən işlərin, təhsilin keyfiyyətinin yüksəldilməsi, eləcə də beynəlxalq standartlara uyğunlaşma məqsədinə xidmət etdiyini vurğulayaraq, bu fəaliyyətlərin 2025-ci ildə də uğurla davam etdiriləcəyini qeyd edib.
