Klinik fənlər və hərbi tibb kafedrasının baş müəllimi, tibb üzrə fəlsəfə doktoru Sabir Novruzovun Bağırsaq Keçməməzliyi Sindromu adlı dərs vəsaitinin təqdimat mərasimi keçirilib.
Ali təhsil ocağının Elm və innovasiya məsələləri üzrə prorektoru Elsevər Əsədov elm sahəsində yeni nəşrlərin çap olunmasını akademik heyət və tələbələr üçün mühüm töhfə kimi dəyərləndirib. Qeyd olunub ki, bu gün təqdim edilən dərs vəsaiti də tibb tələbələri və bu sahədə fəaliyyət göstərən mütəxəssislər üçün vacib mənbədir.
Tibb fakültəsinin dekanı vəzifəsinin müvəqqəti icraçısı, biologiya elmləri doktoru, dosent Ənvər İbrahimov bildirib ki, kitab yığcam və sxematik tərtib edilərək tədris proqramına uyğun hazırlanıb. Diqqətə çatdırılıb ki, dərs vəsaitindən ümumi cərrahlıq, cərrahi xəstəliklər, uşaq cərrahlığı və onkoloji xəstəliklər fənnlərini tədris edən müəllimlər, o cümlədən ümumi cərrahlar, yaxın sahələrin mütəxəssisləri də istifadə edə bilərlər.
Klinik fənlər və hərbi tibb kafedrasının professoru İsa Abdullayev qeyd edib ki, vəsaitdə nazik və yoğun bağırsağın keçməməzlik ilə ağırlaşan anomaliyaları, inkişaf qüsurları, cərrahi xəstəlikləri, xoş və bədxassəli şişləri, bağırsağın cərrahi əməliyyatlarından sonrakı patoloji vəziyyətləri eyni zamanda onların epidemiologiyası, klinikası, müasir diaqnostikası və və bir sıra mühüm məsələlər öz əksini tapıb.
Klinik fənlər və hərbi tibb kafedrasının dosenti Cəbi İsmayılov 21 başlıqdan ibarət dərs vəsaitinin mövzu başlıqlarına uyğun cərrahi əməliyyat şəkilləri və sxemlərlə zəngin tərtibatından bəhs edib.
Klinik fənlər və hərbi tibb kafedrasının müdiri, dosent Gültəkin Əliyeva bildirib ki, kitabın tədris prosesində mövzunun öyrənilməsi və mənimsənilməsi üçün tələbələrin qarşılarına çıxacaq çətinlikləri aradan qaldırmaq üçün mühüm məlumatlar toplusudur.
Çıxış edənlər müəllifi təbrik edib, elmi fəaliyyətində davamlı uğur azru ediblər.
Sonda müəllif dərs vəsaitinin ərsəyə gəlməsində göstərilən diqqətə görə universitet rəhbərliyinə minnətdarlıq edərək, tədbir iştirakçılarına səmimi təşəkkürünü çatdırıb.
