Naxçıvan Dövlət Universitetinin EMSA (Avropa Tibb Tələbələri Təşkilatı) üzvü olan Tibb fakültəsinin “Müalicə işi” ixtisası üzrə təhsil alan tələbələri beynəlxalq mübadilə proqramı çərçivəsində Rumıniyanın paytaxtı Buxarest şəhərində “Carol Davila" Tibb və Əczaçılıq Universitetində olublar. 22-29 mart tarixlərində tələbələr UMFCD universitetində Praktiki Anatomiya Dərsində, Tədris Xəstəxanasında ortopedik əməliyyatlarda iştirak ediblər. Həmçinin Ümumi Cərrahi əməliyyatlarda iştirak edib müşahidələr aparıb, laparoskopiya üzrə simulyasiyada iştirak edərək təlimlər alıblar. Tələbələr Buxarest şəhərində mədəni, sosial proqramlar və gəzintilər də iştirak ediblər.
Bildirək ki, mübadilə proqramına uyğun olaraq 6-13 may 2025-ci il tarixlərində isə Buxarestdən 11 tələbənin Naxçıvan Dövlət Universitetinə gəlməsi gözlənilir.
Qeyd edək ki, Naxçıvan Dövlət Universitetinin yerli və xarici universitetlərlə bağlanan əməkdaşlıq müqavilələri, mübadilə proqramları vasitəsi ilə müəllim və tələbələrin xarici universitetlərdə bir müddətlik təhsil və fəaliyyətini davam etdirmə, təcrübə və dərs keçməsi təmin edilir. Burada da əsas məqsəd təhsildə daha keyfiyyətli və innovativ yanaşmaları tələbələrə öyrətmək , digər üniversitetlərin proqramlarından istifadə edərək daha yaxşı mütəxəssis kimi formalaşmalarına imkanlar yaratmaqdır. Bu əsasda mübadilə proqramı tələbələrə böyük fürsətlər təklif edir.
