Təsviri incəsənət kafedrasının Professoru, Xalq rəssamı
e-mail: huseynqulueliyev@ndu.edu.az
03 fevral 1949-cu ildə Ordubad rayonunun Bist kəndində anadan olmuş, kənddəki, orta məktəbi bitirmişdir. 1971-1975-ci illər ərzində Ə.Əzimzadə adına Azərbaycan Dövlət Rəssamlıq məktəbində, 1977-1982-ci ildə isə Azərbaycan Dövlət İncəsənət İnstitutunun rəssamlıq fakültəsində təhsil almışdır. O, təsviri incəsənətin müxtəlif sahələrində: boyakarlıq, qrafika, heykəltəraşlıq, dekorativ-tətbiqi sənət, teatr-dekorasiyası rəssamı, geyim eskizləri tərtibatçısı kimi fəaliyyət göstərir.
Rəssamın əsərləri İranın Tehran, Təbriz, Xoy, Urmiya və digər şəhərlərində, Türkiyənin İğdır, Qars, Bursa, Ankara, İstanbul, Trabzon, Gürcüstanın Tiflis, Türkmənistanın Aşqabad, Rusiyanın Moskva, Ukraynanın Kiyev, Xarkov, Koreyanın Seul şəhərlərində təşkil edilmiş sərgilərdə əsərləri nümayiş olunmuşdur. Bakıda bir sıra sərgilərdə iştirak etmiş, Naxçıvan şəhərində dəfələrlə fərdi sərgiləri keçirilmişdir. Hazırda rəssamın əsərləri İran, Türkiyə, Almaniya, Ukrayna və başqa ölkələrində şəxsi kolleksiyalarda saxlanır, Bakı və Naxçıvanın rəsm qalereyalarında sərgilənir, onlardan bir çoxları isə Naxçıvan Tarix muzeyinin, Ədəbiyyat muzeyinin, Cəmşid Naxçıvanskinin ev muzeyinin, Cəlil Məmmədquluzadənin Naxçıvan Şəhərindəki və Nehrəm kəndindəki ev muzeylərinin, Hüseyn Cavidin ev muzeyinin, həmçinin Xatirə muzeyi, Şadlinski muzeyi və başqa muzeylərin dəyərli eksponatlarıdır.
Hüseynqulu Əliyev 1982-1989-cu illərdə Naxçıvan Dövlət Rəsm Qalereyasında fond müdiri, 2000-2011-ci illər ərzində Naxçıvan Muxtar Respublikası Rəssamlar Birliyinin sədri vəzifəsində çalışmışdır. 1988-ci ildən Naxçıvan Dövlət Musiqili Dram teatrının baş rəssamı, 2003-2019-cu illər ərzində Naxçıvan Dövlət Universitetində Təsviri incəsənət kafedrasının müdiri vəzifəsində işləmişdir. Hal-hazırda Naxçıvan Dövlət Universitetinin professorudur.
1988-ci ildə Naxçıvan MR əməkdar incəsənət xadimi, 1999-cu ildə Azərbaycan Respublikasının əməkdar rəssamı, 2002-ci ildə Azərbaycanın Xalq rəssamı fəxri adlarına layiq görülmüşdür. 1986-ci ildən SSRİ Rəssamlar İttifaqının və Azərbaycan Rəssamlar İttifaqının, 2000-ci ildən isə Azərbaycan Teatr Xadimləri İttifaqının üzvüdür. 2008-ci ildən dosent, 2017-ci ildən professor elmi adlarına layiq görülmüşdür.